მეცხრე დღე

მეცხრე დღე


დღის წესრიგი:

1. პროექტის პორტფოლიოს გადახედვა და სრულყოფა

2.პორტფოლიოს ატვირთვა ინტერნეტში

3. პროექტის პრეზენტაცია

4. რეფლექსია ბლოგზე.


        ჩვიდმეტი ნოემბერი, ტრენინგის ბოლო დღე. ,, დამთავრდა“, ვფიქრობ დილიდან და ძალიან სერიოზულად მოწყენილი დავყურებ საათს. ბევრი ტრენინგი მოვისმინე და ახლა მახსენდება,რომ არც ერთის დასრულება არ მწყენია ასე, თუ არ ჩავთვლი მაია ჯალიაშვილისა და ლალი დათაშვილის ტრენინგებს. გადავწყვიტე დღეს მაინც არ დამეგვიანა.   ძალიან საინტერესო დღე გველოდა წინ, საინტერესო და დატვირთული. უნდა შგვეჯამებინა  მთელი ტრენინგების ნამუშევრები.
       დავიწყეთ. ჯერ პორტფოლიოს გადავხედეთ. მოგვწონს გაფორმებული პორტფოლიო, ხან საათებით, ხან კალენდარით ვაფორმებთ.დავამატეთ და სრულყოფილი სახე მივეცით პორტფოლიოს.
        შემდეგ პორტფოლიო ინტერნეტში ავტვირთეთ და პროექტის პრეზენტაციაც მოვაწყვეთ.
       ვიმუშავეთ ბლოგზეც. ნამდვილად ვიცი, რომ ძალიან მომენატრება აქაური გარემო და კოლეგების ,,ქეთი მიშველე“...ვნატრობ, კიდევ ერთი ტრენინგი რა,....
      ტრენინგის დასასრულს ძალიან დიდი მადლობა მინდა ვუთხრა პროექტის ხელმძღვანელებს და  ქალბატონ ქეთი ცერაძეს, საოცარი გულისხმიერების, მოთმინებისა და სიყვარულის გამო.

მერვე დღე

მერვე დღე:


დღის წესრიგი:

1. ფასილიტაციის ნიმუშების შექმნა.

2. პორტფოლიოს გადახედვა პორტფოლიოს ჩეკ-ლისტის მიხედვით.

     
          კიდევ ერთი ტრენინგი და დავასრულებთ. ცუდია, ვფიქრობ და გული მწყდება. კარგი რა, დე, მეუბნება ჩემი შვილი და იცინის. მოეშვი მაგ კომპიუტერს, მე კი მინდა, რომ ბევრი ვიმუშაო და რაც შეიძლება მეტი. ვხვდები რატომ სხედან ბავშვები ასე ჯიუტად კომპიუტერთან. დილიდან ვემზადები ტრენინგისთვის. ვჩქარობ. საოცარია, როგორც არ უნდა ვეცადო, მაინც ვაგვიანებ. იქნებ, იმიტომ, რომ დაგვიანება ჩემი სუსტი წერტილია.... კარს ვაღებ და ვფიქრობ, იქნებ ერთხელ მაინც მისაყვედუროს ქეთიმ. არა, ...ძალიან თბილად მიღიმის და მეძახის ,,მოდი, ნანა...“ კომპიუტერთან ვჯდები და თანაგუნდელებს ვათვალიერებ, ისევ ისმის ,,ქეთი მოდი“, ,,ქეთი ვერ ვადიდებ“, ,,კეთი თუ შეიძლება“... დაუსრულებლად.
          ტრენინგი საინტერესოდ დაიწყო. გავიმეორეთ წინადღის მასალები და გადავედით ახალ მასალაზე. შევქმენით ფასილიტაციის ნიმუშები და პორტფოლიოს გადავხედეთ ჩეკ-ლისტის მიხედვით.
       დღე მთავრდება. ნამუშევრებს ვათვალიერებ.მგონი კმაყოფილი ვარ.

მეშვიდე დღე.

 დღის წესრიგი:

   . მოსწავლეთა განსხვავებული საჭიროებების გათვალისწინება.

  . დამხმარე მასალის მომზადება განსხვავებული საჭიროებების მქონე მოსწავლეებისათვის

 . გეგმის დახვეწა-სრულყოფა

        საოცარი სისწრაფით გარბის დრო და ხშირად მახსენდება  უსაყვარლესი მწერლის ნოდარ დუმბაძის  ზურიკელას სინანული სტუდენტური დღეების სწრაფად გასვლის გამო. რაც კარგია ყველაფერი მალე მთავრდება, ჩვენი ტრენინგიც მალე დასრულდება. გული მწყდება, ასეთი თბილი ურთიერთობა დიდი ხანია არ მქონია. მინდა, რომ ხშირად ვიყო აქ.  ვიკითხე კიდეც, არ შეიძლება კიდევ ვიარო მეთქი? ქეთის გაეღიმა და თავი გაიქნია. რა ცუდია, გავიფიქრე და მუშაობას შევუდექით.
       დღე დავიწყეთ წინა- მასალის გამეორებით. შემდეგ გადავედით ძალიან საინტერესო მასალის შესწავლაზე. ავხსენით განსხვავებული საჭიროებების მქონე მოსწავლეებისათვის საჭირო მასალის მომზადება და გეგმის დახვეწა- სრულყოფა. დავამზადეთ დეამხმარე მასალა.

ტრენინგის მეექვსე დღე

მეექვსე დღე:

 დღის წესრიგი:

1. მოსწავლის ნამუშევრების შეფასება და შესაბამისი რუბრიკის დამზადება,

 2.პროექტის ფოტოალბომის შექმნა გადატანა ბლოგზე.


        შემიძლია ვთქვა, რომ რაღაცები მეც ვისწავლე. მეექვსე დღეს მივხვდი, რომ არც ისეთი დაბნეული ვარ, როგორც მეგონა. სახლში, ქეთის გარეშე დარჩენილმაც მოვახერხე რაღაცების გაკეთება და როცა გამომივიდა, კიდევ ერთხელ ვადიდე ჩვენი მხიარული და საყვარელი ტრენერის მოთმენა. ესე იგი, სულ ტყუილად გავყვირით ,,ქეთი, გვიშველე“. რა უცნაურადაც არ უნდა მოგეჩვენოთ, ჩემთვის ,,ინტელის სასწავლო კურსი“ გაუგებარი აღარაა, გაუგებარი კი არა, ძალიან საინტერესოა. მომწონს პროექტზე მუშაობა.  
        დღე ძალიან საინტერესო და შრომატევადი იყო. ტრენინგი სულ უფრო საინტერესო ხდება. დავიწყეთ წინა დღის შესწავლილი მასალის გამეორებით. შემდეგ მოსწავლეთა ნამუშევრები შევაფასეთ სპეციალურად, ამ ნამუშევრების შესაფასებლად დამზადებული რუბრიკით. შემდეგ შევქმენით პროექტის ფოტოალბომი და გადავიტანეთ ბლოგზე.
      განსაკუთრებით მომეწონა რუბრიკების შექმნა.

მეხუთე დღე

დღის წესრიგი:

.საავტორო უფლებები

.მოსწავლის ნიმუშების განხილვა

.ბლოგის ინსტრუმენტების გარჩევა

         ნამდვილი შემოდგომაა, ოქროსფერი, მშვიდი, წყნარი,სასიამოვნო. დიდი ხანია ასეთი შემოდგომა არ ყოფილა. ახლა ქუჩაში ხეტიალი და ჩამოცვენილი ფოთლების კრეფაა სასიამოვნო, თუმცა ,,ტრენინგს“ არ ეღალატება.  ოთახში შესულს სასიამოვნო გარემო გვხვდება.  მიყვარს აქ მოსვლა, ერთი იმიტომ, რომ აქ ბევრი მეგობარი მყავს, მეორე კი, ტრენერის, ქეთის დამსახურებაა, გასაოცარი, კეთილი ღიმილით, რომ გვხვდება და ცდილობს რაც შეიძლება მეტი ინფორმაცია მოგვაწოდოს.  ,,ღმერთო, მიეცი ამ ქალს შეძლება“.
           დღე ძალიან საინტერესოდ დაიწყო. გავიმეორეთ წინა დღის შესწავლილი მასალა.ვიმუშავეთ საავტორო უფლებებზე.შევქმენით და განვიხილეთ მოსწავლის ნიმუშები და ასევე გავარჩიეთ ბლოგის ინსტრუმენტები.შევქმენით ბლოგი.
          ,, შევქმენით“ ვწერ და მეღიმება, რადგან  მე კი არა, ასე მგონია ყველაფერს ქეთი ქმის, ყველგან ისაა, და ალბათ ყველაფერს ის აკეთებს.

მეოთხე დღე

დღის წესრიგი:

.დროში გაწერილი შეფასების გეგმა

.პროექტის პორტფოლიოს პრეზენტაციის შექმნა

.პრეზენტაციის გადატანა ბლოგში

      ცივა.მოღრუბლული დღეა, ცრის. წესით ტრენინგზე წასვლა კიდეც უნდა მეზარებოდეს, მაგრამ ჩემდა გასაკვირად სიხაულით მივდივარ. რაღაც უცნაური გარემო შექმნა ტრენერმა, მიგვიხარია ყველას. ტრენინგი დაიწყო. ,,ქეთი, მოდი რა,'' ,,ქეთი დამეხმარე", ,,ქეთი მიშველე", ,,ქეთი დავიკარგე", ,,ქეთი...." ისმის ყველა მხრიდან, ღმერთო, შენ მიეცი ამ ქალს შეძლება! გაკვირვებული ვარ მისი სიმშვიდით.

      ტრენინგის მეოთხე დღეს დატვირთული იყო სიახლეებით. გავიმეორეთ წინა დღის მასალა და დავიწყეთ დროში გაწერილი შეფასების გეგმის შესწავლა, პროექტის პორტფოლიოს პრეზენტაციის გეგმა და ვისწავლეთ პრეზენტაციის გადატანა ბლოგში.